Gesjieddenis
Wie 't begós...
Vastelaovesvereniging De Hopsjlokkers is opgerich in 1952, ómdet men toen vónj det Zjwame riep woor óm zelf vastelaovindj te viere in eige dörp. Ómdet véúr dae tied nag noojt ‘ne eige vastelaovindj woor gehaje, mós nag toesjtumming gevraog waere aan meneer pesjtoor.
Vastelaovindj waas vreuger de daag van ’t bekènde 40 oeregebed mit groot kirkelik Lof inne middig. Oppe zaoterdig veur de eerste vastelaovindj in 1952 ginge de oprichters van de Zjwamer vastelaovindj – Vors Hoppius I (Pierre Hendrickx van Broewers Sefke vanne Moutfebriek), Harrie Peeters (Dick vanne Zaalder) en Cor Wijnands (Graaf Bollemenski en ózze eerste kretser, oftwaal sikkertares) – same mit kandidaat-Prins Thei I op audiejensie biej pesjtoor Hoen. Van dit gesjprek zooj aafhange of in ’t Zjwamerlandj ’ne eige vastelaovindj gehaje móch waere. ’t Doerde lang eer meneer pesjtoor toesjtumming goof. “G’r gaot de duvel in eige hoes haole”, wore zien wäörd. Hae goof aan det ziej pas nao ’t 40 oeregebed, dus nao veer oer sjmiddes, móchte beginne.
Daonao waas börgemeister Strens aan de beurt. Toen de börgemeister heurde det meneer pesjtoor al toesjtumming haaj gegaeve, waas hae ouch drek akkoord. De börgemeister deej toen de historiese oetsjpraok: “Versjaf Zjwame ’n paar daag van echte joeks en Thei, haaj det sjtielvól”. De Zjwamer Vastelaovindj en vastelaovesverenging De Hopsjlokkers wore ’n feit!
Laot gaon dae wage!
Prins Thei I regeerde es eerste Prins van de Hopsjlokkers in 1952 mit es liefsjpreuk “Laot gaon dae wage”. In die daag waas det ’n algemein gezèkde óm aan te gaeve van “zit ’m op en maak d’r ’t bèste van”. Dees sjpreuk waas ouch ’t leijmotief veur ziene vastelaovessjlager, dae nag altied gezónge waert mit de Zjwamer vastelaovindj. Thei komponeerde ouch de bekènde Zjwamer sjlager “Zjwamerlandj det Gekkelandj”.
In 1953 waerde d’r gènne nuje Prins gekaoze in verbandj mit de watersnoodramp. De opbrings van de Bóntje Aovindj ging toen nao de sjlachoffers van deze ramp.
Naam en simbool
Biej de keuze van de naam Hopsjlokkers sjpeelde de aanwezigheid van de Moutfebriek in Zjwame ’n grote ról. In dees febriek waerde (en waert nag altied) gers gemout, óm daonao door broewerieje toet in verre ómsjtreke gebroek te waere veur ’t broewe van beer. Naeve mout is ouch hop belangriek in beer en ein van de grutste sjmaakmakers. Aangezeen v’r ‘m in Zjwame good löste, waerde ’t beer drinke vertaald in “hopsjlokke”. Pierre Hendrinckx (zoon van de direkteur vanne Moutfebriek) waerde de eerste Vors en kreeg de naam Hoppius. Toet op vandaag waere ós Vorste zo genump en is de Vors ouch herkènbaar aan ziene aafwiekende sjteek.
’t Simbool van de Hopsjlokkers is ’n meule. Vreuger sjtóng d’r in Zjwame ’n kaoremeule biej Hilkens aan de Sjtasionssjtraot. Zjwamer luuj waere ouch waal dök Zjwamer Gekke genump, es-of die zèk mer ’ne sjlaag van de meule höbbe gehad. Daoróm kump de meule truuk in ’t logo en diverze anger utinge, zo-es de septer van de Prins en Vors (die v’r “de meule” en “Vorstemeule” numme) en ouch de sirremoniesjtek. Zjwame waert den ouch neet veur nieks ’t Gekke- en Meulelandj genump.
Aktiviteite en jubelejums
V’r höbbe altied väöl aktiviteite georganizeerd en doon det nag sjteeds. In willekeurige volgorde zin det de äöpening van ’t sezoen oppe 11e vanne 11e, de Liedjesaovindj, de Bóntje Aovindj, de Sjo!, ’t Kuulköpke en de grote Zjwamer Optoch. In 2013 höbbe v’r ’t ouch grótter aangepak en ’t LVK georganizeerd in de Jo Gerrishal in Zjwame-Zuid. In de jaore wo-in v’r ’n jubelejum vierde (1962, 1973, 1984, 1995, 2006, 2017), dus óm de 11 jaor, waerde ouch diverze ekstra aktiviteite of aksies gehaje. ’n Bezónjer vermeljing is hiej zeker op zien plaats: biej gelaegenheid van ós jubelejum in ’t sezoen 2005-2006 is ’t jubelejumbook “5 x 11 jaor Laot gaon dae wage” oetgebrach en ’t Hopsjlokkersmonement is toen naeve de Zjwaambrök geplaats.