De Vereniging

Prins Thei I (de Loo) regeerde es eerste Prins vanne Hopsjlokkers in 1952 en 1953. Door watersnoodramp in 1953 waerde in det jaor geine nuje Prins gekaoze. Opbrings vanne Bontje Aovindj ging nao de sjlachoffers van deze ramp.

De liefsjpreuk van Prins Thei I woor "Laot gaon dae wage". Dit is auch ’t leidmotief veur ziene vastelaovessjlager en dae nag altied eine TOP-HIT tiedes de Zjwamer vastelaovindj. Thei komponeerde auch de bekènde zjwamer jeugsjlager "Zjwamerlandj det Gekkelandj".

Omdet veur 1952 nag nooit eine eige vastelaovindj in Zjwame woor gehaje, mós in dae tied nag toesjtumming gevraog waere aan meneer Pesjtoor. Vastelaovindj waas vreuger de daag van ’t bekinde 40 oeregebed mit groot kirkelik Lof inne middig. ’s Zaoterdigs veur de eerste vastelaovindj in 1952 ging Vorst Hoppius I (Piejair van Broewersef - Moutfebriek), Dick vanne Zaalder en Cor Wijnands, de oprichters vanne zjwamer vastelaovindj same mit kandidaat-prins Thei I op audiejensie biej meneer Pesjtoor Hoen. Van dit gesjprek zooj aafhange of in ’t Zjwamerlandj eige vastelaovindj gehaje móch waere. ’t Doerde lang eer meneer Pesjtoor door de kneen ging. "Geur gaot de duuvel in eige hoes haole" wore zien wäörd mer goof waal aan det oeteindelik toesjtumming om pas nao ’t 40 oeregebed, nao veer oer sjmiddes te beginne. Daonao woor meneer de burgemeister Strens aan de beurt. Toen de burgemeister heurde det pesjtoor al toesjtumming haaj gegaeve woor hae ouch drek accoord. Burgemeister Charles Strens deej toen de historische oetsjpraok: "versjaf Zjwame ein paar daag van echte joeks en Thei haaj det sjtielvol..... "

Op vastelaovesmaondig om 5 oer leep heel Zjwame oet inne haop getuge te zin van ’t eerste optraeje van de intoch van dae Prins, dae euver alle Hopsjlokkers de Meule kwoom zjweije. Prins Thei I, ein alleszins gezeen figuur, zooj mit gerös hert de sjleutels en embleme passend biej zien prinselikke waerdigheid, euverhenjigd kriege van toenmalig loco-burgemeister Wullemke Alers.

De Zjwamer Vastelaovindj en Vastelaovesverenging de Hopsjlokkers wore ein feit !

Bron oprichters van de Zjwamer Hopsjlokkers: Cor Wijnands, 1e Krètser (secretaris) vanne Hopsjlokkers Prins Thei de Loo I, allereerste Prins van oos vereniging

Veur zin dees miense en alle angere Hopsjlokkers väöl dank versjöldigd. Names de V.V. de Hopsjlokkers Vorst Hoppius VI