't ZAAG

’t ZAAG sjteit veur ’t Zjwamer Aad-Adjudante Genootsjap. Deze groep waerde lange tied vergaete, terwiel ziej es sjteun en toeverlaot van ós Prinse toch waal altied de zjwaorste ról haje. Altied eerder den de Prins opsjtaon en later nao bèd. Zorge det de Prins netjes drop sjteit, zorge det d’r altied medalies en kedo’s óm henj zin, de Prinsesjteek op- en aafzitte en de meule euvernumme es de Prins hendjes mót gaeve of efkes nao ’t klènste kaemerke mót. En ’t allerbelangriekste waat in ’t drejbook veur Prins en adjudante sjteit: zorge det de Prins neet ómgaeve waert door te väöl glazer beer en hiej en dao ’n hendje helpe mit opdrinke.

Op vastelaovesvriedig 24 fibberwarie 2017 waerde ’t ZAAG opgerich biej Herberg De Bos door de dao aanwezige aad-adjudante. Besjlaote waerde det allein aad-adjudante lid móchte waere die gèn Aad-Prins van de Hopsjlokkers zin. ’t ZAAG eigende zich dae daag ouch metein ein eige böske toe óm in verveurd te waere. De sjtatute waerde op ’n viltje gezatte en det is mer good ouch. In 2019 waerde namelik ein van häör leje Prins (Peter van Soest) en det beteikende det dae ’n jaor later opgenaome zooj waere biej de Aad-Prinse. Door Peter te benumme toet besjermheer van ’t ZAAG, móch d’r toch lid blieve. Ouch veur adjudante (‘ne Hopsjlokker) van Hopsjlokkers die in anger plaatse Prins waere, is d’r ’n plaetske binne ’t ZAAG.

Bliej zin ze es d’r ‘ne Prins waert oetgerope mit twee adjudante die gèn Aad-Prins zin, mer de teleursjtèlling is groot es ’t twee men zin die waal al èns Prins zin gewaes.

De leje van ’t ZAAG zin te herkènne aan de mansjetknuip in de vorm van zaegskes.