Regerend ónger ’t motto "Op Vólle Toere", 70ste Prins van de Zjwamer Hopsjlokkers, gebaore in Zjwame-Zuid op 22 julie 1978 es jóngste zoon van Henk en Trees Speijcken, en es breurke van Bas en Rolf. Leve van Irene Bouten oet ’t Drakelandj en greutse pap van dochters Lizzy en Lara. Besjermheer van De Meister toet aan De Lanck en alles waat dao links en rechs van ligk. Verkuiper biej Collomix GmbH oet Beiere, mer dao allein op kantoor aanwezig tiedes ’t oktoberfees en róndj de Kers, genetend van weizen beer. Veteraan biej DES same mit Prins Roel I van V.V. De Fobmötse, henjig mit de bal en daobiej ouch nag sjnel oppe mountainbike. Leerling sjnaoreplökker van de lege toet de hoge E, meister in ’t sjpele van de lóchgitaar en bienao klaor óm op Sjwaampop te sjtaon. Filmsjter oet de Zjwamer sjpeelfilm Knjørpjøt en toneelsjpeler biej de Zjwamer Revu mit of sónger kleijer aan. Sfeerpreuver biej de Formule1. Trèkvogel van De Bósrandj toet aan Effe NIEKs. Werreldreiziger in ’t Zjwamerlandj mit aaf en toe ’n oetsjtepke mit ’t gezin nao ’n werm landj. Buuffetplekker toet in de late uurkes. Vóttevaeger van vajer toet propper, mer waal mit prinselik floere pepier. Leefhöbber van sjtevige rock meziek en groot fen van de PB bend. Opperbevelhöbber van adjudante Dennis Richter en Dirk Julicher en alle angere Hopsjlokkers en Hopsjlökkerkes.

Verordonnere en make bekènd:

1. Det Zjwame d’r flink taengenaan moog gaon deze vastelaovindj en ónger ’t motto "Op Vólle Toere" de vastelaovesplaetjes good gemiks waere.
2. Det mien gezin en ich groot fen zin van De Erpelkes en "biej-zunjer" greuts zin det veur häör 5x11 jubelejum mit moge viere.
3. Det mien adjudante Dennis en Dirk mich de vót nao mótte drage, mer ich mich es aad-vóttevaeger prima allein kèn redde op ’t klènste kaemerke.
4. Det ich de mountainbike veurluipig laot sjtaon en mien kóndisie op piel haaj door te sjpringe en väöl in de polenaes te loupe.
5. Det Zjwame riek is aan gezellige kefees en ’ne trèkvogel neet wied hoof te vlege óm ’n kaertje te gaon ligke.
6. Det ich in 2011 Bacchus Nagel I bön gewaes ónger ’t motto "Toet de lèste dröppel, zo zaat wie eine knöppel" en noe nag sjteeds neet vèttig bön van ein lekker glaas beer.
7. Det op Kroppesjtraot 20 toet asgoonsdig allein mer vastelaovesmeziek klink, zodet veur ouch in hoes de dólle daag good doorkómme.
8. Det ich ’t vuurke gaer get opsjtaok, zodet ederein gooj dórs krieg, mer de tent zeker neet in de fik zal laote vlege.
9. Det v’r vanwaege ’t kórte sezoen flink gaas mótte gaeve, mer ich zeker weit det v’r deze race mit sukses oetrieje.
10. Det "Slapen en Smullen" gesjlaote blief veur gaste tiedes de vastelaovindj en inkel door mien adjudante in geval van hoge nood gebroek moog waere.
11. Det de Vastelaovindj 2024 offesjeel op 11 fibberwarie begint en det ich d’r heel gaer mit alle Zjwamer vastelaovesgekke same ’n ónvergaetelik en sjentjig sjoon fees van maak.

Aldus opgemaak door de sikkertares van de Hopsjlokkers, Rick Beulen, op 22 november 2023, veurzeen van ’n lekker glaeske Brugse Zot, tösse de Sinterklaossurpriezes en biej ’ne lekende vreeskas.

LAOT GAON DAE WAGE EN VEUR GAON OP VÓLLE TOERE!!