Z.D.H. Prins Bram II

Proklamasie

Regerend ónger ’t motto “Altied Raak”, 71ste Prins van de Zjwamer Hopsjlokkers. Gebaore op 5 april 1972 es zoon van Toon en Nellie Verrijt, ’n paar jaor in ’t Neelder Katerriek gewoond en daonao nao Zjwame gekómme. Dao oeteindelik weer weg gegange óm nao ’n ómzjwerving via Sitterd, Heijenrath en Termaar toch weer truuk te kómme en ’t Prinselik pelies gelaege op Veldjpaort 19 te gaon bewone. 2×11 jaor getrouwd mit Marieke, det vastelaovindj haet lere viere biej de CCH in Gebrook. Greutse pap van dochter Keiki en zoon Max. Baasje van kat Skibby mit döbbel b, want es ‘t mit döbbel p woor, haaj d’r eine kangeroe in hoes gehad. Vertaegewäördiger biej Flevosap en väöl te vinje in Pruse óm Meistersaft te verkoupe, mer meer leefhöbber van gehopte drank. Groothertog van ’t hoogste puntj van Heijenrath toet ’t leegste puntj in de Beet naeve de Zjwaam. Opperdèkseleer biej Aan Dae Reem van oppe maot en d’r naeve. Bekènde vastelaovesgek op eder groot en klein vastelaovesevenement in Limburg. Ambassedeur van alle óngesjmienkde gezichter en passieve sjporters. Kefeedeursjloeter in de late uurkes. Leefhöbber van alles wo ’t waord “fees” veur sjteit en alles waat aet- en drinkbaar is, zolang ’t mer gènne wien is. Kammeraod van adjudante Flor en Sjriek Simons die ’m deze vastelaovindj de vót nao moge drage. Veurgenger van alle Zjwamer Hopsjlokkers en Hopsjlökkerkes.

Verordonnere en make bekènd:

  1. Det v’r ónger ’t motto “Altied Raak” zeker d’r van kènne zin det ’t nootj mis zal zin deze vastelaovind en det ’t dus euveral in Zjwame (en ouch in Zjwame-Zuid) groot fees geit waere
  2. Det op eder pötje ‘ne dèksel pas, wen ze mer aafblieve van mien dèksels
  3. Det miene sjtappetèller normaal gesjpraoke neet väöl te doon haet, mer euveroere zal make tiedes de vastelaovindj
  4. Det ich las höb van FOMO en dus ouch nieks van de Zjwamer vastelaovindj wil misse
  5. Det mien adjudante en ich de liefsjpreuk “waat mót, det mót” höbbe, mer ich vastelaovindj viere zeker neet es verplichting zeen
  6. Det ich groot leefhöbber bön van blaosmeziek en den ouch haop det mien vrunj van Aan Dae Reem geregeld mit ós dropoet gaon
  7. Det ich nao ‘ne aovindj doorzakke gènne las höb van koppien en ich daoróm ouch gaer toet de lèste blief hange
  8. Det ’t waord “Gezellig” in mien waordebook mit houflètter G gesjreve waert en ich zeker weit det ’t deze vastelaovindj in eder Zjwamer kefee Gezellig zal zin
  9. Det ich jaore ’t hoogsgelaege hotel van Nederlandj höb gehad, gèn hoogtevrees höb en dus mit alle plezeer baove oppe nuje prinsewage zal sjtaon op vastelaovesmaondjig
  10. Det ich es aad-besjtuurslid van KVW aan de weeg höb gesjtange van de motertoch en dus weit det de jeug ouch flink gaas kèn gaeve mit de vastelaovindj
  11. Det de Zjwamer Vastelaovindj 2025 offesjeel op 2 meert begint en det ich d’r same mit uch ’n ónvergaetelik Gezellig fees van maak

Aldus opgemaak door de sikkertares van de Hopsjlokkers, Rick Beulen, op 26 november 2024 oppe veldjpaort mit ’ne goje aolieból en ’n lekker fleske Helles Pülleken en mit de gerdiene pottoe, zodet Aad-Prins Lei I neet nao binne kós kieke.

LAOT GAON DAE WAGE EN DEZE VASTELAOVINDJ IS ’T ALTIED RAAK!!