Medalies & óngersjeijinge
De Hopsjlokkers reike versjillende medalies en óngersjeijinge oet. Hiejónger zeet geur wèlke det zin en waat de beteikenis daovan is.
Keremieke medalie
Dees jaorlikse keremieke medalie waert (in beperkte oplage) door de Prins aan vastelaovindj vierend Zjwame oetgereik en is ’n waor kunswirk. Aafhankelik van ’t gekaoze motto is d’r ’n passend akteweel óntwerp gemaak.
Dees medalie waert al sins 1962, biej gelaegengheid van ’t 11-jäörig jubelejum, mit de handj gemaak, geglazuurd en gebakke door de femielie Crompvoets. Destieds door Sef, vanaaf 1984 door Joop en sins 2022 door Thuur.
De achterligkende gedachte waas det d’r get anges mós kómme den waat d’r in anger sjtaej en dörpe gebroekelik waas. In plaats van blinked iezer en nepgoldj mós ’t get aards zin, zo-es plaatselikke kleij. De eerste medalie waas ’n óntwerp wo-in de Zjwamer Meule sentraal sjtóng. Toet op vandaag kump biej eder jubelejum de meule truuk in ’t óntwerp.
Verenigingsmedalie
Veur kènne gènne vaste Raod van Èlf en dus krieg eder lid van ós vereniging dees medalie.
Zilvere Meule
Veur leje die häör 2×11-jäörig jubelejum viere.
Golje Meule
Veur leje die häör 3×11-jäörig jubelejum viere.
Kómmedeursorde
De Kómmedeursorde in bróns waert op versjillende momente oetgereik, namelik aan:
- De Prins biej zien aaftraeje.
- Leje die häör 1×11-jäörig jubelejum viere.
- Miense die väöl veur de vastelaovindj in Zjwame höbbe beteikend.
De Prins dreug de Kómmedeursorde in zilver tiedes zien regeerperiode en dees geit daonao door nao ziene opvolger.
Aad-Prinse medalie
Es ’ne Prins aaftreudj, is d’r vanaaf den ex-Prins. Mit Halfvaste waert d’r, es mit good gevolg ’n “toetraejingsekzame” is aafgelag, opgenaome biej de Sosjeteit van de Zjwamer Aad-Prinse. Op det moment krieg d’r de Aad-Prinse medalie, veurzeen van zien jaortal.
Mit dees medalie en häöre Prinsesjteek (óntdaon van ’t dóns) zin de Aad-Prinse herkènbaar biej aktiviteite.
Nepomukóngersjeijing
’n Brónze óngersjeijing veur ’ne persoon of groep dae zich op sosjaal en/of kultureel gebied bezónjer verdeensteelik haet gemaak veur de Zjwamer gemeinsjap. Dit is naodrökkelik gèn vastelaovesmedalie, mer ’n algemeine waardering vanoet de gemeinsjap veur jaorelange inzat veur en betrókkeheid in Zjwame.
Dees óngersjeijing is in 1982 bedach door Bair Heijnen en is geïnsjpireerd op ’t beeld van de heilige Johannes Nepomucenus (Nepomuk) oppe Zjwaambrök. Destieds waerde besjlaote det de Hopsjlokkers de óngersjeijing zoje gaon oetreike aan ’ne Zjwamer miens of groep. Det is toe noe toe bienao eder jaor gebeurd, op 2014 en de coronajaore nao.