Akteweel

Zjwamer Vastelaoveskwis

17 jannewarie 2021

Zin de Aartjes of de Fobmötse kwa leje aantal groter? En wèts doe wie dök de Bezelse draak door Zjwame is gesjtaole? Mesjien kries se op dees en anger vraoge op 12 fibberwarie antjwaord. Den vinjt namelik de eerste edisie plaats van de ’Grote Zjwamer Online Vastelaoves Kwis’.

’t Belaof eine sjentjig sjone aovindj te waere vól mit vastelaovesmeziek, ludieke vraoge en leuke opdrachte! Neudig dien vrunj en vriendinne oet en maak d’r eine gezellige aovindj van!

Mit sjpele kèn geweun online vanaaf toes in teams van max. 4 persone.

’t Insjriefgeldj bedreug € 15 per team en daoveur krieg geur ein sjoon en lekker vastelaovespakketje en de res geit in de priezepot dae besjtaedj kèn waere biej diverse Zjwamer óngernummers

Vanaaf kómmende waek kènt geur uch insjrieve. Haaj Social Media in de gate veur meer informasie.

Bekiek hiej de grotere verzie van de foto

Vader Aar 2020

10 fibberwarie 2020

Op zaoterdig 8 fibberwarie is tiedes ein drök bezóch Aartjesbal in Asselt Vader Aar 2020 oetgerope. Vader Aar Jurre Janssen moog dit jaor de kuus zjwejje euver Asselt! Jurre haet ’t neet van eine vraemde. Ziene pap Frank woor in 1996 Vader Aar en in 2003 Prins van De Hopsjlokkers. Frank zal Jurre den ouch same mit kammeraod Flint óngersjteune in deze vastelaovestied. Veur winse Vader Aar Jurre van herte perfisiat!

Bekiek hiej de grotere verzie van de foto

Prins Gino en Prinses Jady

03 fibberwarie 2020

Op zaoterdig 1 fibberwarie is ’t nuje Prinsepaar van De Erpelkes oetgerope. Prins Gino en Prinses Jady gaon dit jaor De Erpelkes veur en moge d’r mit de vastelaovindj 4 daag veur zorge det ós Zjwamer jeug lekker in bewaeging kump! Det zal häör óngetwiefeld gaon lökke! Veur winse Prins Gino en Prinses Jady van herte perfisiat!

Bekiek hiej de grotere verzie van de foto

Prins Jordi I

26 jannewarie 2020

Ózze nuje Prins: Prins Jordi I!! Jordi haet 100 daag mótte wachte mer moog ós noe eindelik veurgaon es 68ste Prins! Deze S62 trainer moog eindelik in bewaeging kómme en zal zeker gans Zjwame in bewaeging kriege! Det duit hae same mit zien adjudante Roy en Rob! Perfisiat aan Prins Jordi I, zien adjudante en alle aanhang! Laot gaon dae wage!

Bekiek hiej de grotere verzie van de foto

Prins Harrie I

26 jannewarie 2020

Op zaoterdigaovindj 25 jannewarie is de nuje hoogheid van de Fobmötse oetgerope! In ein gezellig Kesjotje woor de sjpanning te sjnieje. Naodet twee Aad-Prinse van de Fobmötse dachte det ze nag ’ns aan de mach kóste kómme, kwoom den eindelik de echte hoogheid d’r oet! Prins Harrie I (Harrie Kessels) zal dit jaor de Fobmötse de vastelaovindj doortrèkke! Veur winse Prins Harrie I en zien adjes van herte perfisiat!

Bekiek hiej de grotere verzie van de foto

Bacchus Siem I

20 jannewarie 2020

Op vriedig 17 jannewarie is in ’t Bacchuspelies de nuje Bacchus oetgerope. 3 keuninge en eine echte kemeel kwome van achter oet de zaal nao veur. Es nuje Bacchus waerde nemes minder den Bacchus Siem I (Siem Konings) achter ’t maske oet teveursjien getoverd! Siem waert biejgesjtange door zien adjes Daan Konings, Tim Geraedts en Kenji van Keeken. Es ’t deze Bacchus ’ne keer teväöl waert door de drank, zal d’r nemes zin dae det merk. Ziene tweelingbroor en adje Daan kèn ’t den mekkelik efkes euvernumme. Veur winse Bacchus Siem I van herte perfisiat!

Bekiek hiej de grotere verzie van de foto

Prins Luc I

13 jannewarie 2020

Op zaoterdig 11 jannewarie is Prins Luc I (Luc Pechtold) oetgerope toet de nuje Kwekkerteprins! Luc woont oppe Baove Boekoel en hoof dus mer eine keer good te sjpringe óm in de Kwekkertepool terech te kómme. Det guldj ouch veur zien adjudante, want det zin zien bure Roy en Ron. Vanoet de Hopsjlokkers winse veur Prins Luc I, zien adjes en de femilie van herte perfisiat!

Bekiek hiej de grotere verzie van de foto

Boerebroedspaar 2020

27 november 2019

Op zónjig 24 november is in De Mert ’t nuje Boerebroedspaar van 2020 oetgerope! Gans in moderne sjtiel mit witte sneakers ónger de kleijer kwome ein veur ein de dames en here van 't gezelsjap teveursjien! Mit inkele tips waerde langzamerhandj dudelik waem 't nuuj Boerebroedspaar is. Nemes minder den Boerebroed Senna (Koolen-Mestrom) en Boerebroedegom Rob (Koolen) kwome in rólsjteul de zaal binne gerees! Euverdudelik ein paar det altied in bewaeging is en det lete ze de zaal metein merke. Vanoet de Hopsjlokkers van herte perfisiat! Maak d’r ein geweldig sezoen van!

Bekiek hiej de grotere verzie van de foto

Oetsjlaag Liedjesaovindj 2020

18 november 2019

Op zaoterdig 16 november höbbe veur weer eine gezellige liedjesaovindj gehad. 7 deilnummers sjtónge dae aovindj oppe buun. De Zjwamer Liedjesaovindj is gewónne door de Fob Bagge® Bend mit häör nummer "Neet zónger vastelaovindj"! De Vois Kids is gewónne door De Zjwamer Föbkes mit häör toet in de puntjes verzorgde optraeje! De Vois van Zjwame is gewónne door No Cleem! De tweede plaats oppe liedjesaovindj is gehaold door De Zjwamer Aad-Prinse. Note Allergie ging d’r mit de derde plaats van door. Veur bedanke ederein dae haet biejgedrage aan deze sjone aovindj!

Bekiek hiej de grotere verzie van de foto

Mulder Gerard I

12 november 2019

Op maondjig de ellefde van de ellefde is róndj de klok van 11 euver 8 de nuje Mulder oetgerope. Nao ’t aaftraeje van inmiddels Ex-Mulder Sjoerd I, kwoom de maelzak oet ’t Muldershoes nao boete. In dae maelzak zoot nemes minder den de nuje Mulder: Mulder Gerard (Olde) I! Gerard is gein ónbekènd gezich binne de Zjwamer vastelaovindj. Haer lup al get jaore mit biej De Boerebroelof. Same mit ziene knech Frank zal hae de kómmende tied toet aan asgoonsdig de meule drejjend mótte haje! Van herte perfisiat! Nao 11 geweldige sjeut mit ’t knón en ’t äöpene van ’t Muldershoes (Keffee De Geitesjtal) kós ’t fees losbarste! De Zjwamer vastelaovindj is weer in bewaeging gezatte!

Bekiek hiej de grotere verzie van de foto

Äöpening sezoen 2019/2020

01 november 2019

Ónger ’t vastelaovesmótto 2019/2020: ”Altied in Bewaeging” van Wim Evers waert oppe Mert in Zjwame, maondjig 11 november aansjtaonde óm 20.11 oer, ’t nuje vastelaovessezoen geäöpend. Mit aan kop ónger angere Z.D.H. Prins Peter III, V.V. de Hopsjlokkers, de Mulders en muzikaal omlies door joekskapel ”Aan dae Reem”, vinjt d’r vanaaf 20.11 oer ein kompleet programma plaats met ónger angere: de äöpening van ’t Muldershoes, ’t bekènd make van de nuje Mulder 2019, ’t in bewaeging zitte van de Zjwamer Meule, gevólg door 11 knónsjeut. Ederein dae de Zjwamer Vastelaovindj ein werm hert toedreug, is hiejbiej van herte oetgeneudj.

Bekiek hiej de grotere verzie van de foto

Zjwamer Liedjesaovindj 2020

29 september 2019

De eerste insjrievinge van deilnummers zin al binne en veur zin ouch alweer good op waeg mit alle veurbereidinge veur de Zjwamer Liedjesaovindj 2020. Gaer toet 16 november in Zaal "De Mert"!

Bekiek hiej de grotere verzie van de foto

Insjrieve Liedjesaovindj 2020

19 augustus 2019

Veur sjtaon weer in de sjtartblokke mit ’t organizere van de 37ste Zjwamer Liedjesaovindj op zaoterdig 16 november 2019 en de neet meer weg te dinke Vois van Zjwame en de Vois Kids. 3 Kattegerieje wo-binne eine gooj gedaon kèn waere nao ’ne euverwinningstitel. Deilname aan de Liedjes- en Voisaovindj is meugelik veur ederein: soliste, duo’s, trio’s, groepe, vereniginge, sjole enz. enz.. Veur de Liedjesaovindj zin d’r twee veurwaardes: ’t liedje mót ein karnevalesk karakter höbbe en in ’t Zjwaams dialek waere gezónge. Veur de deilnummers die sjtrieje óm de titel ”De Vois van Zjwame” guldj de veurwaarde: ein zelf gesjreve teks in ’t Zjwaams dialek, gezónge op ein besjtaonde melodie. Deilname aan de Vois Kids is meugelik toet 13 jaor. Veur meer informasie en ’t reglement, kèn kóntak waere opgenaome mit Peter Trepels: peter.tr@ziggo.nl Deilname is gratis en insjrieve is meugelik toet zónjig 3 november 2019 op baove genump mailadres.

Bekiek hiej de grotere verzie van de foto