PROKLAMASIE Z.D.H. PRINS ROB I

Veur Prins Rob I:

Regerend ónger 't motto "Net efkes anges", Prins van alle Hopsjlokkers, Hopsjlökkerkes en Erpelkes; 60ste Prins van de Zjwamer Hopsjlokkers. In Tegele biej d'n Oeles op 18 april 1981 gebaore es zoon van John en Lucy Timmermans -Smits. Vrundj van Steffanie Cüppers en samewonend oppe Leetgenssjtraot 39 in Zjwame, wo 't good toeve is. Ich bön opgegreujd oppe Prins Bernhardsjtraot en vervolges oppe Leucker, wodoor mich alle kantje van Zjwame waal bekènd zin. Es aadjste van 3 jónges, erg trots bön op mien breurkes Tom en Thijs. Nao mien HEAO - Economiesjtudie in Sitterd, sinds 2009 hel wèrkende controller bön biej AHC in Blerick, ein bedrief det gesjpesialiseerd is in 't oppervlaktebehanjele van metalen. Ich mer get greuts bön op mien 2 adjudante: Ron Sillen, dae Jeugdprins van de Drake in Beesel is gewaes en Aad-Prins Roy Dijcks, dae 't Prinszin in 2002 waal net efkes anges zal höbbe belaef. Es voetballer biej 't eerste van DES, wovan ich inmiddels 24 jaor lid bön, de hele vastelaovindj probeer te score en es zaalvoetballer biej z.v.v. Kesjotje 3, mich zeker neet oet 't veldj laot sjlaon. Es fervent pokereer biej miene vrundjegroep "de Trekveugel" neet gok op eine gesjlaagde vastelaovindj, mer op zeker sjpeel. Ich gaer nao sjport en films oppe TV kiek, mer tiedes mien regeerperiejode 't beeld op zjwart blief sjtaon. Ich 3 keer Prins bön gewaes, mer veural mit heimwee trökdink aan mien Prinsejaor in 1993 biej de Erpelkes wo ich same mit Simone Smeets 't Prinsepaar vormde en daodoor mich 't vastelaovesgeveul mit de paplaepel is ingegaeve. Ich es Grootheer vanne Leetgenssjtraot en alles waat dao rondjómhaer lik, mer al te good weit, wie lank de waeg nao de Mert is. Desondanks haop, det geur allemaol oppe tiëd, euveraI en biej alle vastelaovesaktiviteite aanwezig zit. Ich de kómmende waeke get meer aafsjtand zal numme van mien normale aktiviteite en mich volledig zal inzitte veur de Zjwamer Vastelaovindj, zodet veur same op asgoonsdig kènne zekge: det waas in positieve zin, net efkes anges.

Verordonnere en make bekend:

1. Det dit jaor ónger mien motto "Net efkes anges", dit ouch dudelik waerd oetgebeeld en oetgedrage.

2. Det mien vriendin Steffanie es Remunjse Kaketoe, nao Zjwame is oetgevlaoge en hiej de vastelaovindj op ein heel biejzóngere, sjoon meneer is gaon belaeve.

3. Det ich es Prins van de Erpelkes in 1993, in 2010 es Prins van Kesjotje 3 en in 2011 es Prins van DES, ein dermate gooj veuropleijing höb gehad, det ich zeker gein sjteekskes zal laote valle.

4. Det ich in London, in december 2011, vanwaege ei blikske beer, sjlechs 13 minute van eine wedsjtried höb gezeen, wonao ich mit mien vrunj oet 't sjtadion bön gezat. Mer in Zjwame haop det eine pils, mien lievelingsdrenkske, mich neet de kop geit kóste.

5. Det mien pap, dae meer den 20 jaor voetbaltrainer is gewaes, noe aan het aafkicke is.

6. Det ich neet van beeste haaj, mer lever zelf de bees oethang.

7. Det ich van opruime haaj, mer mit de vastelaovindj geur alles kènt laote ligke tot daags d'rnao, óm den weer plezerig verder te kènne gaon.

8. Det ich tiëdes de vastelaovindj, net wie inne zaal es op 't veld, de bal op ein plezerige meneer zal laote rolle en gèn kans veurbiej zal laote gaon.

9. Det ich es Prinselikke wielrenner, euveral gaer vanne partiej bön en d'r mich nörges, óngemerkt, tössenoet fiets.

10. Det veur mich es Prins, nao de driej dolle daag, 't sjpel noch lang neet is oëtgesjpeeld.

11. Det de vastelaovindj dit jaor offisjeel op 19 fibberwarie begint en haop det heel Zjwame mich 3 daag op miene waeg blief volge, óm same de Zjwamer kleure en 't gemeinsjapsgeveul te kènne oetdrage, wobiej ich ederein dae wo of waat get organiseert, alle suukses wins en oeteraard veur ederein, eine sjitterende vastelaovindj in ós eige Zjwame.

Aldus opgemaak door de sikkertaris van v.v. de Hopsjlokkers op donderdig 19 jannewarie 2012, op 't mement det mien vriendin Steffanie in bad ging en ich same mit Peter alle ruumte kreeg, óm alles de revue te kènne laote passere.

Laot gaon dae wage,

Z.D.H. Prins Rob I