LÈSTE NUUJTS ZJWAMER OPTOCH 2012
Net efkes anges

Rondj de 52 groepe, wages, duo's/trio's en einlinge zalle dit jaor de Zjwamer Optoch vorme op vastelaovesmaondjig 20 fibberwarie. De optoch zal om 13.30 oer van sjtart gaon vanaaf de Gelresingel. De route is net wie anger jaore: Meulewaeg, Bossjtraot, Riekswaeg, Neersjtraot, Hoogsjtraot, Mertsjtraot, Mert, Bröksjtraot, Kroppesjtraot, Sjlabberskamp, Wilhelminalaan, Julianasjtraot, Bröksjtraot en weer de Mert. Dao waerd de sjtoet ontbonje (wages svp weg via In de Haöfkes of de Mertsjtraot!).

Alle aanwonende wille veur vraoge om 't hoes sjoon te versiere en es geur get vastelaovesmeziek wilt drejje moog det natuurlik ouch! Verder wille veur uch vrunjtelik verzeuke om ugge auto aan de kantj te zitte, zodet d'r gein sjaaj aan kin ontsjtaon en zodet grote wages good doorkinne.

't Publiek mot d'r aan dinke det der weer gecollecteerd waerd veur de priezepot van volgend jaor. Bring dus de beurs mit, en gaef rojaal, zodet ozze optoch kin blieve besjtaon. De priezepot van dit jaor is weer good gevuld en zal door een deskundige jury kort nao aafloup van de optoch verdeild waere. Veur haope det der den nog väöl miense en meziek rondj ut podium zin, zodet 't den auch nog gezellig waerd en blief.

Oppe Mert zal d'r sjtumming gemaak waere, mit meziek en eine prizzentater dae get euver de deilnummers zal vertelle. Veur haope uch allemaol dao te moge begroete.

Veur de deilnummers: nummer aafhaole op zónjig 19 fibberwarie tösse 10.30 oer en 12.00 oer, biej Thijs en Wilma! Verder wille veur de deilnummers vraoge om op tied (ein oer) oppe Gelresingel te zin en good te kieke wo det g'r mot sjtaon. Veur vertrekke om half twee. Deilnummers, dink d'r aan det glaas neet toegesjtaon is tiedes en nao de optoch. Hiej zal sjtreng op gekontroleerd waere!! Es geur get wilt drinke, num den blikskes of plastic verpakkinge mit!

Veur winse deilnummers en zjurie vol succes.

't Zjwamer Optoch Kómmitee
- ZOK -